बुवाको सम्झना
सबैका बा हुन्छन्,
बा का पनि बा, हजुरबा,
हजुरबा का बा, जिजुबा।
जिजुबा, एक इतिहास वर्तमानको,
जिजुबा जिउँदै देख्नु पनि, सौभाग्य हो।
एक जुनीको चोला हो मान्छे,
एक छोरा,
बुवा,
हजुरबुवा,
अनि जिजुबा हुँदै,
इतिहास बन्छ।
जिजुबाको इतिहास हजुरबुवाले बोक्नुहुन्छ,
हजुरबुवाको इतिहास बा सँग हुन्छ।
बुवाको इतिहास छोरा सँग रहन्छ,
सबै एक, तर अर्को इतिहास बन्ने निरन्तरता जस्तो।
बिरुवा ठूलो हुँदै फैलिंदै जाँदा
फैलिएको हाँगा जस्तै
एउटा छहारी बन्छ बा हरूको इतिहास।
साँचै, बा हरू छहारी जस्तै हुनुहुन्छ,
जिन्दगीका घाम-पानीसँग जुधेर
परिवारलाई छहारी दिनुहुन्छ।
बुवाको छाया हुँदा नै जीवनमा
सुरक्षा र शान्तिको अनुभूति हुन्छ।
तपाईंको बलिदानले बनेको हो हाम्रो बाटो,
तपाईंको पसिनाले बनेको हो हाम्रो माटो।
दुख सहेर पनि हाँस्न सिकाउनु भयो,
तपाईंको मुस्कानमै लुकेको थियो
हामीलाई हौसला दिने बल।
तपाईं हरेक खण्डमा खम्बा झैं अडिग हुनुहुन्थ्यो,
तपाईंको आशीर्वादले नै खडा भएको हो यो जीवन।
तपाईंको काँधमा बसेर देखेका थियौं संसार,
तपाईंको शब्दमा भेटेका हो संस्कार।
तपाईंको प्रत्येक पाइला हाम्रो मार्गदर्शन बनेको छ,
तपाईंको कठोर हातको माया हाम्रो सुरक्षा थियो।
बुवा, तपाईं त नदीजस्तै हुनुहुन्थ्यो,
जहाँ तपाईंका भावनाहरू गहिरा, प्रवाह निरन्तर।
तपाईं हाम्रा लागि अग्निजस्तो तातो,
हावा झैं शीतल, अनि धरतीजस्तो विशाल।
जुनसुकै कठिनाइमा,
तपाईंको छायामा आफूलाई सुरक्षित पाउँथ्यौं।
तपाईंको ममता र तपस्या बिना,
हाम्रो जीवन अधुरो थियो र छ,
तपाईंको अस्तित्वले नै हाम्रो अस्तित्व टेकेको थियो र छ।
जहाँ भए पनि सधैंभरिका लागि तपाईं हाम्रा संरक्षक,
हाम्रो प्रेरणा, हाम्रो आदर्श।
तपाईंको मार्गदर्शनमा अघि बढ्दै,
तपाईंको नाममा उचाइ छुन प्रयास गर्दै,
धन्यवाद, बुवा, तपाईंलाई।
तपाईंको अमर माया र स्नेहलाई।
तपाईंको यो अमूल्य विरासतलाई।
बुवा, तपाईं सधैं अमूल्य हुनुहुन्थ्यो, सधैं रहनुहुनेछ।
-सुदर्शन
Comments
Post a Comment